გადაწყვეტილება ბათუმში ხელოვნური კუნძულის მშენებლობაზე
გარემოს დაცვის სააგენტოს გადაწყვეტილება ბათუმში ხელოვნური კუნძულის მშენებლობაზე
გარემოს დაცვის ეროვნულმა სააგენტომ ბათუმში ნაპირსამაგრ სამუშაოებზე გარემოსდაცვითი გადაწყვეტილება მიიღო.
გარემოს ეროვნული სააგენტოს გადაწყვეტილების ფარგლებში ,,ამბასადორი ბათუმი აილენდს” უფლება მიეცა განახორციელოს შავი ზღვის სანაპირო ზოლის ნაპირდაცვითი (ნაპირსამაგრი) სამუშაოები, რომლებიც სამომავლოდ ხელოვნური კუნძულის მოწყობასთან იქნება დაკავშირებული.
სკრინინგის გადაწყვეტილების თანახმად, საპროექტო უბანზე გათვალისწინებულია დამცავი კედლის მოწყობა. გარემოს დაცვის ეროვნული სააგენტოს მიღებული დასკვნის მიხედვით, პროექტის განხორციელების შემთხვევაში პრაქტიკულად გამორიცხული იქნება სანაპირო ზოლში ეროზიული პროცესების განვითარება და შესაბამისად, საავტომობილო გზისა, ზღვის სანაპიროს მიმდებარე ტერიტორიისა და არსებული ინფრასტრუქტურის დაზიანების რისკები.
ბათუმში ,,ამბასადორი ბათუმი აილენდის“ პროექტი ულტრათანამედროვე გასართობ-გამაჯანსაღებელი ტიპის ორი ხელოვნური ნახევარკუნძულის და ერთი კუნძულის შექმნასა და მათზე ინფრასტრუქტურის მოწყობას მოიცავს.
აღნიშნული უმსხვილესი საინვესტიციო პროექტის განხორციელებისთვის 2021 წლის 29 სექტემბერს „ამბასადორი ბათუმი აილენდს“ საქართველოს ეკონომიკისა და მდგრადი განვითარების სამინისტროსა და აჭარის მთავრობას შორის საინვესტიციო ხელშეკრულება გაფორმდა.